Ubushinjacyaha ku Rwego Rwisumbuye rwa Gasabo bwakiriye dosiye y’umugabo w’imyaka 37 y'amavuko ukekwaho gusambanya umwana w’imyaka 15 y’amavuko. 

Icyaha akurikiranyweho cyakozwe ku itariki ya 05/07/2026 mu Karere ka Gasabo Umurenge wa Kinyinya, Akagali ka Kagugu, mu Mudugudu wa Giheka ubwo uregwa yahaga umwana w’umukobwa w’imyaka 15 y’amavuko inzoga n’itabi agamije kumusambanya. 

Uregwa akurikiranyweho ibyaha bitatu: 

1. Icyaha cyo gusambanya umwana akurikiranyweho giteganywa kandi kigahanishwa ingingo 14 y’Itegeko nº 059/2023 ryo ku wa 04/12/2023 rihindura Itegeko nº 68/2018 ryo ku wa 30/08/2018 riteganya ibyaha n’ibihano muri rusange;

2. Icyaha cyo gukubita cyangwa gukomeretsa ku bushake, giteganywa kandi kigahanishwa ingingo ya 11 y’Itegeko nº 059/2023 ryo ku wa 04/12/2023 rihindura Itegeko nº 68/2018 ryo ku wa 30/08/2018 riteganya ibyaha n’ibihano muri rusange;

3. Icyaha cyo guha umwana inzoga cyangwa itabi cyangwa kubimugurisha giteganywa kandi kigahanishwa ingingo ya 27 y’Itegeko N°71/2018 ryo ku wa 31/08/2018 ryerekeye kurengera umwana.