None ku wa 30 Ugushyingo 2026, Umushinjacyaha Mukuru, HABYARIMANA Angelique ndetse n’Umushinjacyaha Mukuru wungirije RUBERWA Bonaventure basuye Ubushinjacyaha ku Rwego Rwisumbuye rwa Nyarugenge. 

Ni uruzindiko ruje nyuma y’uko Umushinjacyaha Mukuru asuye Ubushinjacyaha ku Rwego Rwisumbuye rwa Karongi. 

Muri uru ruzinduko haganiriwe ku ngingo zitandukanye harimo kugezwaho ibyavuye muri raporo y’ubugenzuzi bw’Ubushinjacyaha, gusuzumira hamwe uko ikorwa ry’amadosiye mu ifasi ya Nyarugenge rihagaze ku Bashinjacyaha n’abafasha b’Ubushinjacyaha, ndetse no kuganira ku mikoranire n’izindi nzego.

Mu ijambo rye, Umushinjacyaha Mukuru wungirije, RUBERWA Bonaventure, yagarutse ku musaruro wagezweho mu gihembwe cya mbere cy’uyu mwaka, ashima Abashinjacyaha n’Abafasha b’Ubushinjacyaha bitwaye neza mu kazi kabo. Yabasabye gukomeza gusigasira ibyiza bagezeho, anashishikariza abandi kongera imbaraga mu kazi kugira ngo barusheho kugera ku ntego Ubushinjacyaha bwihaye.

Mu ijambo rye, Umushinjacyaha Mukuru yibukije Abashinjacyaha n’Abafasha b’Ubushinjacyaha gukomeza kurangwa n’ubunyamwuga, ubunyangamugayo n’ubwitange mu kuzuza inshingano zabo. Yabashishikarije gushyira imbere imikorere inoze, kwihutisha ikorwa ry’amadosiye no guharanira ko abaturage bahabwa ubutabera buboneye kandi ku gihe.

Yibanze kandi ku gukurikirana ibyaha by’ihohoterwa, asaba Abashinjacyaha kurushaho gushyira imbaraga mu ikurikiranacyaha ryabyo, kwita ku burenganzira bw’abahohotewe no gukora ibishoboka byose kugira ngo bene ibyo byaha bikurikiranwe neza.