Ku wa 21 Ukwakira 2026, Umushinjacyaha Mukuru, HABYARIMANA Angélique, yatangiye gahunda yo gusura inzego 12 zisumbuye z'Ubushinjacyaha mu gihugu, hagamije kurebera hamwe ibyagezweho no kuganira ku ngamba zo kurushaho kunoza itangwa ry'ubutabera. 

Muri iyi gahunda haganirwa ku ngingo zitandukanye zirimo kugezwaho ibyavuye muri raporo y’ubugenzuzi bw’Ubushinjacyaha, gusuzumira hamwe uko ikorwa ry’amadosiye rihagaze ku Bashinjacyaha n’abafasha b’Ubushinjacyaha, kuganira ku mikoranire n’izindi nzego, kurebera hamwe ibyagezweho n'imbogamizi zihari, no gusuzumira hamwe ingamba zo kurushaho kunoza itangwa ry'ubutabera. 

Muri iyi gahunda kandi hatumiwe n'izindi nzego zigize urunana rw'ubutabera zirimo Ubugenzacyaha, Urukiko Rwisumbuye, ndetse na Polisi hagamijwe kuganira ku mikoranire y’inzego no kunoza serivisi z’ubutabera zihabwa abaturage.

Uruzinduko rw’Umushinjacyaha Mukuru ku Rwego Rwisumbuye rwa Karongi

Iyi gahunda yatangiriye ku Bushinjacyaha ku Rwego Rwisumbuye rwa Karongi Ku wa 21 Ukwakira 2026, aho Umushinjacyaha Mukuru yagiranye ibiganiro n'abakozi b'Ubushinjacyaha ndetse n'abahagarariye izindi nzego z'ubutabera zo mu Ntara y'Iburengerazuba.

Mu ijambo rye, nyuma yo kugezwaho ibyavuye muri raporo y’ubugenzuzi bw’Ubushinjacyaha, Umushinjacyaha Mukuru yashimangiye ko umuturage agomba guhora ku isonga, kandi ko intego ihuriweho ari ugutanga ubutabera bunoze no kurengera abahohotewe, haba ku buzima cyangwa ku mutungo. Yasabye abakozi gukomeza ubufatanye hagati yabo no hagati y'inzego z'ubutabera.

Uruzinduko rw’Umushinjacyaha Mukuru ku Rwego Rwisumbuye rwa Nyarugenge

Ku wa 30 Ukwakira 2026, Umushinjacyaha Mukuru, ari kumwe n’Umushinjacyaha Mukuru wungirije, RUBERWA Bonaventure, basuye Ubushinjacyaha ku Rwego Rwisumbuye rwa Nyarugenge.

Mu ijambo rye, Umushinjacyaha Mukuru wungirije, yagarutse ku musaruro wagezweho mu gihembwe cya mbere cy’uyu mwaka, ashimira Abashinjacyaha n’Abafasha b’Ubushinjacyaha bitwaye neza mu kazi kabo. Yabasabye gukomeza gusigasira ibyo bagezeho, anashishikariza abandi kongera imbaraga mu kazi kugira ngo barusheho kugera ku ntego z’Ubushinjacyaha.

Umushinjacyaha Mukuru, yibukije Abashinjacyaha n’Abafasha b’Ubushinjacyaha gukomeza kurangwa n’ubunyamwuga, ubunyangamugayo n’ubwitange mu kuzuza inshingano zabo. Yabasabye gushyira imbere imikorere inoze, kwihutisha ikorwa ry’amadosiye no guharanira ko abaturage bahabwa ubutabera buboneye kandi ku gihe.

Yashimangiye kandi ko hakwiye gushyirwa imbaraga mu gukurikirana ibyaha by’ihohoterwa, kwita ku burenganzira bw’abahohotewe no gukora ibishoboka byose kugira ngo ibyo byaha bikurikiranwe mu buryo bunoze.

Uruzinduko rw’Umushinjacyaha Mukuru ku Rwego Rwisumbuye rwa Gasabo

Ku wa 4 Ugushyingo 2026, Umushinjacyaha Mukuru, ari kumwe n’Umushinjacyaha Mukuru Wungirije, basuye Ubushinjacyaha ku Rwego Rwisumbuye rwa Gasabo.

Muri uru ruzinduko Umushinjacyaha Mukuru wungirije yashimiye abakozi umusaruro bageze, asaba buri wese kwibanda ku nshingano ze akazikora neza kandi bakubahiriza amabwiriza agenga ikurikirana ry’imanza. 

Mu ijambo rye, Umushinjacyaha Mukuru yasabye abakozi gushyira imbaraga mu kunoza serivisi zihabwa abaturage, kurinda umutungo w’abakorewe ibyaha, kwihutisha irangizwa ry’imanza no kumenyesha abarega imyanzuro y’amadosiye yabo. Yashimiye abakozi umusaruro.

Uruzinduko rw’Umushinjacyaha Mukuru ku Rwego Rwisumbuye rwa Ngoma

Ku wa 05 Ugushyingo 2026, Umushinjacyaha Mukuru yasuye Ubushinjacyaha ku Rwego Rwisumbuye rwa Ngoma. 

Umushinjacyaha Mukuru ahereye kuri raporo y’Ubugenzuzi yashimiye abakozi bakoze neza.Yasabye abakozi kubahiriza amabwiriza ya Perezida w'Urukiko rw'Ikirenga agenga imiburanishirize y'imanza z'abana, guharanira ko abaturage bahabwa serivisi nziza, ndetse no kwita ku madosiye arimo imitungo hihutishwa imanza zirebana nayo. Yibukije kandi ko ari ngombwa kwita ku burenganzira bw’abahohotewe no gukora ibishoboka byose ibyo byaha bigakurikiranwa uko bikwiye.